ကြိုးမဲ့ လျှပ်စစ်ဓာတ်အား ပို့လွှတ်ခြင်း နည်းပညာ ၏ ယနေ့ခေတ် အခြေအနေ ဆောင်းပါး

Article Tech

နှစ်ပေါင်း ၁၀၀ လာ အိပ်မက်ဖြစ်ခဲ့တဲ့ ကြိုးမဲ့ လျှပ်စစ်ဓာတ်အားဟာ လာမယ့် နှစ်များမှာ အမှန်တကယ် ဖြစ်လာနိုင်ဖွယ် ရှိနေပါတယ်။

ကြိုးမဲ့ အားသွင်းခြင်း၊ လျှပ်စစ်စွမ်းအင်သုံး ကားများ၊ 5G နည်းပညာ ထွန်းကားခြင်း နှင့် ပိုမိုရေရှည်တည်တံ့ရန် လိုအပ်ခြင်းများကြောင့် ကမ္ဘာ အနှံ့အပြားတွင် အပြည့်အဝ လည်ပတ်နိုင်တဲ့ ကြိုးမဲ့လျှပ်စစ် နည်းပညာကို ဖွံ့ဖြိုးတိုးတက်လာစေဖို့ တွန်းအားတွေ ဖြစ်လာပါတယ်။

အမေရိကမှ Wave Inc မှသည် ဂျပန် အခြေစိုက် Space Power Technologies နှင့် နယူးဇီလန်ရှိ စွမ်းအင် ကုမ္ပဏီတခုဖြစ်တဲ့ Emord တို့အထိ ပါဝင်တဲ့ ကုမ္ပဏီအချို့ဟာ ကြိုးမဲ့ လျှပ်စစ်ဓာတ်အား ပို့လွှတ်သည့် နည်းပညာကို အသုံးချနိုင်ဖို့ လုပ်ဆောင်နေပါတယ်။

အချို့သော စနစ်များအတွက် စမ်းသပ်စစ်ဆေးမှုများကိုတောင် စတင်နေပြီ ဖြစ်ပြီး ထိရောက်ပြီး ကုန်ကျစရိတ်သက်သာကာ အသုံးပြုနိုင်သည့် ကြိုးမဲ့လျှပ်စစ်ဓာတ်အား နည်းပညာလိုအပ်မှုကို ဘယ်သူက ပထမဆုံး ဖြေရှင်းနိုင်မလဲဆိုတာ စိတ်ဝင်စားစရာပါ။

ကြိုးမဲ့ လျှပ်စစ်ဓာတ်အား ပို့လွှတ်ခြင်းရဲ့ နောက်ကွယ်က သမိုင်းနှင့် သိပ္ပံပညာ

ကြိုးမဲ့လျှပ်စစ်ဓာတ်အား ပို့လွှတ်သည့် နည်းပညာနှင့် ပတ်သက်ပြီး ပြောရမယ်ဆိုရင် အဆိုပါ နည်းပညာ နောက်ကွယ်ရှိ ၎င်း၏ အရင်းခံ သဘောတရားကို နားလည်နိုင်ဖို့ အရေးကြီးပါတယ်။

၁၈၉၁ ခုနှစ်တွင် ဆားဘီးယား-အမေရိကန် တီထွင်သူ Nokola Tesla ဟာ လျှပ်စစ်ပဲ့တင်ရိုက်ခတ်မှု နိယာမ အရ လုပ်ဆောင်သည့် တမူထူး ခြားသည့် Tesla coil ကို ဒီဇိုင်းထုတ်ကာ ဝါယာကြိုးများမပါဘဲ လျှပ်စစ်ဓာတ်အား ပို့လွှတ်နိုင်ခဲ့ပါတယ်။

သို့ပေမယ့် coil ဟာ တိုတောင်းသော အကွာအဝေးတွင်သာ ကြိုးမဲ့လျှပ်စစ်ဓာတ်အားကို သယ်ဆောင်နိုင်ပြီး ၎င်း၏ အကန့်အသတ်ရှိတဲ့ အလားအလာကြောင့် ဒီနည်းပညာကို ကြိုးမဲ့လျှပ်စစ်ဓာတ်အား ပို့လွှတ်ခြင်းအတွက် လက်တွေ့အသုံးချမှုတခု ဖြစ်မလာခဲ့ပါဘူး။

Tesla ဟာ ၎င်း၏ ကြိုးမဲ့ လျှပ်စစ်စွမ်းအင် ပို့လွှတ်သည့် စိတ်ကူးကို စွဲလမ်းနေဆဲဖြစ်တဲ့အတွက် နောက်ပိုင်းနှစ်များတွင် ဗို့အားမြင့် ကြိုးမဲ့ပါဝါ ပို့လွှတ်မှု high-voltage wireless power transmission (WPT) ကို လုပ်ဆောင်နိုင်တဲ့ စွမ်းအင် စခန်းတခုကို တည်ဆောက် ခဲ့ပါတယ်။

အဆိုပါ စမ်းသပ်မှုမှတဆင့် Tesla ဟာ နေရာတကျ ရှိနေတဲ့ တာဝါတိုင်များ သို့မဟုတ် စနစ်တကျ ချိတ်ဆွဲထားတဲ့ ပူဖောင်းများကို အသုံး ပြု ပြီး အကွာအဝေး အများကြီးသို့ ကြိုးမဲ့ မက်ဆေ့ချ်များ ပေးပို့နိုင်ဖို့ ရည်ရွယ်ခဲ့ပါတယ်။

သူဟာ Long Island ကျွန်း တွင် ကြိုးမဲ့ပို့လွှတ်စခန်း (Tesla သို့မဟုတ် Wardenclyffe တာဝါလို့ခေါ်) ကို သူဖြစ်နိုင်တယ်လို့ ယုံကြည်သည့် တာဝေး ကြိုးမဲ့ လျှပ်စစ်ဓာတ်အား ပို့လွှတ်ခြင်းကို သက်သေပြနိုင်ဖို့ တည်ဆောက်ခဲ့ပါတယ်။

ကံမကောင်းတာကတော့ ရင်းနှီးမြှုပ်နှံသူ J.P. Morgan ဟာ သူ၏ စမ်းသပ်မှုများအတွက် ရန်ပုံငွေ ပိုမိုပေးဖို့ ငြင်းဆိုခဲ့ပြီး စီမံကိန်းကို ၁၉၀၆ ခုနှစ်တွင် ပိတ်သိမ်းခဲ့ပြီး နောက်ပိုင်း အဆိုပါနေရာကို ဖျက်သိမ်းခဲ့ပါတယ်။

၁၉၄၃ ခုနှစ်လောက်တွင် Nokola Tesla ဟာ ၎င်း၏ ကြိုးမဲ့လျှပ်စစ် ပို့လွှတ်မှု အိပ်မက်ကို ပြီးဆုံးအောင် လုပ်ဆောင်မသွားနိုင်ဘဲ ကွယ်လွန်ခဲ့ပေမယ့် လွန်ခဲ့တဲ့ နှစ် ၁၀၀ လောက်အတွင်းမှာ သုတေသနနှင့် လေ့လာမှု အများအပြားက ဥာဏ်ကြီးရှင် တီထွင်သူ Tesla ဟာ ကြိုးမဲ့ လျှပ်စစ် ပို့လွှတ်မှု အတွက် မှန်ကန်တဲ့ လမ်းကြောင်းပေါ်မှာ ရှိနေခဲ့ကြောင်း သက်သေပြနေပါတယ်။

ယနေ့ခေတ်မှာတော့ ကြိုးမဲ့ စွမ်းအင် ပို့လွှတ်ခြင်းဆိုင်ရာ နည်းလမ်း အမျိုးမျိုးကို တီထွင်လျက်ရှိပြီး ၎င်းတို့ကို ကြီးမားသော အတိုင်းအတာဖြင့် အကောင်အထည်ဖော်ရန် သုတေသနပြုမှုများ ဆက်လက် လုပ်ဆောင်နေပါတယ်။

ဂြိုဟ်တုမှတဆင့် နေရောင်ခြည်စွမ်းအင် ပြန်လည်ပို့လွှတ်ခြင်း

ဒါဟာ မြင့်မားသည့် ကမ္ဘာ့ပတ်လမ်းကြောင်းတွင် နေရာချထားသည့် နေရောင်ခြည် စွမ်းအင်သုံး ဂြိုဟ်တုများကို အသုံးပြုခြင်းများ ပါဝင်သည့် အလားအလာရှိသည့် နည်းလမ်းတခု ဖြစ်ပါတယ်။

ဂြိုဟ်တုဟာ နေရောင်ခြည်ကို စွမ်းအင်အဖြစ်သို့ ပြောင်းလဲပေးမှာဖြစ်ပါတယ်။ စွမ်းအင်ဟာ မိုက်ခရိုဝေ့ဖ်များဖြင့် ဖွဲ့စည်းထားပါတယ်။

ထိုမှတဆင့် မိုက်ခရိုဝေ့ဖ် အချက်ပြလှိုင်းများကို မြေပြင်ရှိ အင်တာနာ တခု သို့မဟုတ် ပင်မ လျှပ်စစ် ဓာတ်အားပို့လွှတ်ရုံသို့ လွှဲပြောင်းပေးသည့် စနစ်ဖြစ်ပါတယ်။

အဆိုပါ ဓာတ်အားပေးရုံမှာ မိုက်ခရိုဝေ့ဖ်လှိုင်းများကို DC လျှပ်စစ်အဖြစ်သို့ ပြောင်းလဲပေးမှာ ဖြစ်ပါတယ်။

မကြာသေးမီက Caltech ၏ ဘုတ်အဖွဲ့ဝင်ဖြစ်သည့်အပြင် အိမ်ခြံမြေ ရင်းနှီးမြှုပ်နှံမှု ကုမ္ပဏီ Irvine Company ၏ ပိုင်ရှင်ဖြစ်သည့် Donald Bren ဟာ Caltech ကုမ္ပဏီ ၏ Space Solar Power Project (SSPP) အတွက် ဒေါ်လာ သန်း ၁၀၀ လှူဒါန်းမည်ဟု ကြေညာခဲ့သည်။

အဲဒီ့ Caltech ၏ စီမံကိန်းအကြောင်းကို “ကမ္ဘာဂြိုလ်အတွက် စွမ်းအင်တွေ ပေးနိုင်မည့် Caltech ရဲ့ အာကာသ နေရောင်ခြည် စွမ်းအင် စီမံကိန်းသစ် အကြောင်း” ခေါင်းစဉ်ဖြင့် ဖော်ပြခဲ့ပြီး ဖြစ်ပါတယ်။

မိုက်ခရိုဝေ့ဖြင့် စွမ်းအင် ပို့လွှတ်ခြင်း

ဒီနည်းလမ်းတွင် မိုက်ခရိုဝေ့ဖ် ရောင်ခြည်ဟာ reciver နှင့် DC rectifier တို့ အကူအညီဖြင့် DC လျှပ်စစ်စွမ်းအင်ကို ပြောင်းလဲသွားတာ ဖြစ်ပါတယ်။

မိုက်ခရိုဝေ့ဖ် စွမ်းအင် ပို့လွှတ်မှုမှ အမြင့်ဆုံး efficiency ဟာ ၈၄ ရာခိုင်နှုန်းလောက်ရှိပြီး ဒီ အချက်အလက်ကို ၁၉၇၅ ခုနှစ်က ဂျပန်နိုင်ငံရှိ အဖွဲ့တဖွဲ့က မှတ်တမ်းတင်ခဲ့တာ ဖြစ်ပါတယ်။

ဒါကိုကြည့်ခြင်းအားဖြင့် အဲဒီ့ခေတ်က ပို့လွှတ်နိုင်မှုဟာ effieiceny အလွန်နည်းတာကို တွေ့ရှိရပြီး နောက်ထပ် ရည်မှန်းချက်ကတော့ ဝေးကွာတဲ့အကွာအဝေးကို efficiency မြင့်မားသော စွမ်းအင် ပို့လွှတ်မှုရရှိနိုင်ဖို့ ဖြစ်ပါတယ်။

၂၀၂၁ ခုနှစ် ဩဂုတ်လတွင် ဂျပန်နိုင်ငံ Tsukuba တက္ကသိုလ်မှ ထုတ်ဝေခဲ့တဲ့ သုတေသန တခုအရ စွမ်းအင်မြင့် မိုက်ခရိုဝေ့ဖ် ဓာတ်ရောင် ခြည်ဟာ အာကာသထဲသို့ ဒုံးပျံများ ပစ်လွှတ်ရန်အတွက် efficient ဖြစ်တဲ့ ကြိုးမဲ့စွမ်းအင် အရင်းအမြစ်တခု အဖြစ် လုပ်ဆောင်နိုင်ကြောင်း ထုတ်ဖော် ပြသခဲ့ပါတယ်။

ရော့ကတ်ကို အာကာသထဲသို့ ပစ်လွှတ်သည့်အခါ လောင်စာဆီဟာ ၎င်း၏ အလေးချိန်ရဲ့ ၉၀ ရာခိုင်နှုန်းလောက်အထိ ရှိပြီး မိုက်ခရိုဝေ့ဖ် အခြေခံ ကြိုးမဲ့စွမ်းအင် နည်းပညာကို အသုံးပြုနိုင်ပါက အဆိုပါ ဝန်ကို ဖယ်ရှားနိုင်မှာပါ။

Photo: Courtesy of Escape Dynamics Via eedesignit

ဒီနည်းပညာကတော့ အတော်လေး ထူးခြားတယ်လို့ ပြောလို့ရပါတယ်။

လေဆာရောင်ခြည်ဖြင့် ပို့လွှတ်ခြင်း

အထိရောက်ဆုံးသော DC to Laser converter များဟာ Fiber optic နှင့် free-space လေဆာ ဆက်သွယ်ရေးများတွင် စီးပွားဖြစ် အသုံးပြုသည့် solid-state laser diodes များဖြစ်တယ်ဆိုတာ ပြသပြီး ဖြစ်ပါတယ်။

လေဆာ ထုတ်လွှင့်မှုဟာ photovoltaic receiver မှ လေဆာရောင်ခြည်ကို လက်ခံရရှိစေပြီး တူညီသည့် လျှပ်စစ်စွမ်းအင်ကို ထုတ်ပေးနိုင်ပါတယ်။

လေဆာအခြေပြု စွမ်းအင် ထုတ်လွှင့်မှု၏ အားသာချက်မှာ တာဝေး ကြိုးမဲ့လျှပ်စစ်ပို့လွှတ်မှုအတွက် လေဆာရောင်ခြည်များကို ပိုမို လွယ်ကူစွာ ထိန်းချုပ်နိုင်ခြင်းပဲ ဖြစ်ပါတယ်။

ကြိုးမဲ့စွမ်းအင် ပို့လွှတ်မှုဟာ နယူးဇီလန်နိုင်ငံအတွက် အိပ်မက်တခုမဟုတ်တော့ပါ

စွမ်းအင် ကုမ္ပဏီဖြစ်တဲ့ Emrod ဟာ မကြာခင်မှာပဲ ရှေ့ပြေးပုံစံ ကြိုးမဲ့စွမ်းအင် ပို့လွှတ်သည့် အခြေခံ အဆောက်အအုံတခုကို စမ်းသပ်တော့မှာ ဖြစ်ပါတယ်။

တကယ်လို့ စမ်းသပ်အောင်မြင်ပြီဆိုပါက ၎င်းဟာ နယူးဇီလန် အစိုးရ၏ နိုင်ငံ တဝှမ်း ကြိုးမဲ့ စွမ်းအင် ထုတ်လွှတ်မှု တပ်ဆင်ခြင်း အတွက် ကြီးမားသော တွန်းအားပေးမှု ဖြစ်လာမှာ ဖြစ်ပါတယ်။

Emrod ဟာ စွမ်းအင်ပို့လွှတ်နိုင်ဖို့ တနေရာမှ တနေရာသို့ တာဝေး သံလိုက်လှိုင်းများ အသွင်ဖြင့် စွမ်းအင်သယ်ဆောင်နိုင်သည့် ကြိုးမဲ့ အင်တာနာများနှင့် rectenna (rectifying antennas) ကွန်ယက်ကို အသုံးပြုပြီး ထူးခြားသည့် tele-energy နည်းပညာဖြင့် ဒီဇိုင်းထုတ်ထားပါတယ်။

Photo: Courtesy of EMROD Via spectrum.ieee

ပထမဦးစွာ လျှပ်စစ်ဓာတ်အားဟာ အင်တာနာများမှတဆင့် အိုင်ယွန်းမဟုတ်သည့် ရောင်ခြည်ပုံစံဖြင့် ရေဒီယိုလှိုင်းများနှင့် တူညီတဲ့ ကြိမ်နှုန်းဖြင့် လျှပ်ကူးစေမှာ ဖြစ်ပါတယ်။

ကုမ္ပဏီအဆိုအရ “စွမ်းအင်နိမ့် လေဆာဘေးကင်းရေး အကာအကွယ်စနစ်မှ ငှက်သို့မဟုတ် ရဟတ်ယာဉ်များ ဖြတ်သန်းသွားခြင်း မပြုခင် အလင်းတန်းကို ပိတ်ပစ်နိုင်မှာဖြစ်ပြီး ပင်မအလင်းတန်းဟာ လေမှလွဲပြီဂ အခြားအရာနှင့် မထိတွေ့အောင် ဆောင်ရွက်ထားမှာ ဖြစ်တယ်” လို့သိရပါတယ်။

Emord မှ ဒီနည်းပညာဟာ နယူးဇီလန်ရှိ တောင်ထူတပ်သည့် မြေမျက်နှာသွင်ပြင်နှင့် သင့်လျော်ပြီး ဒေသ၏ မတူညီသည့် ရာသီဥတု အခြေအနေများကို ခံနိုင်ရည်ရှိတဲ့အတွက် ဘဏ္ဍာရေး သို့မဟုတ် ပထဝီအနေအထားအရ သမားရိုးကျ ဓာတ်အားလိုင်းများ တပ်ဆင်မရနိုင်သည့် ဒေသများအတွက် အကျိုးကျေးဇူးရှိတယ်လို့ ယူဆထားပါတယ်။

ဒီစီမံကိန်းကို နယူးဇီလန် အစိုးရက ကျောထောက်နောက်ခံ ပြုထားပေမယ့် Emrod ၏ CEO ဖြစ်သူ Greg Kushnir က လူတွေဟာ 5G နည်းပညာနှင့် ပတ်သက်ပြီး သံသယရှိသကဲ့သို့ ဒီ ကြိုးမဲ့ လျှပ်စစ်ပို့လွှတ်မှု စနစ်ကိုလည်း ဆန့်ကျင်နိုင်ဖွယ်ရှိကြောင်း ခန့်မှန်ထားပါတယ်။

စီမံကိန်းနှင့် ဆက်နွယ်နေသည့် တကယ့် စိန်ခေါ်မှုကတော့ ကြိုးမဲ့လျှပ်စစ် ပို့လွှတ်မှုဟာ လူတွေကို အန္တရာယ်မဖြစ်ပေါ်စေကြောင်း အာမခံနိုင်ဖို့ ဖြစ်ကြောင်း သူက ယုံကြည်နေပါတယ်။

Emrod ဟာ Boston တွင် ရုံခန်းတခုရှိပြီး ကုမ္ပဏီ၏ နောက်ထပ် လျှပ်စစ်ဓာတ်အားပေး စီမံကိန်းတခုကို အမေရိကန်တွင် ပြုလုပ်ဖို့ အလားအလာ ရှိနေပါတယ်။

ကြိုးမဲ့ စွမ်းအင် ပို့လွှတ်ခြင်းအတွက် အခြားသော အမိုက်စား လုပ်ဆောင်မှုများ

သန့်ရှင်းပြီး အကန့်အသတ်မရှိတဲ့ စွမ်းအင် ဖြေရှင်းမှုဖြစ်တဲ့ ကြိုးမဲ့စွမ်းအင် ပို့လွှတ်မှုဟာ ၂၁ ရာစု ဆယ်စုနှစ်အသစ်အတွက် လိုအပ်ချက်တခု ဖြစ်ပြီး တိုးတက်မှုများလည်း အများအပြားရှိနေပါတယ်။

Wireless Advanced Vehicle Electrification (WAVE)

Wireless Advanced Vehicle Electrification (WAVE) ဟာ အမေရိကန် နည်းပညာ ကုမ္ပဏီ တခုဖြစ်ပြီး အလယ်အလတ်နှင့် အကြီးစား လျှပ်စစ်စွမ်းအင်သုံး ယာဉ်များအတွက် ကြိုးမဲ့စွမ်းအင် နည်းပညာကို ထုတ်လုပ်နေတာ ဖြစ်ပါတယ်။

WAVE မှ ထောက်ပံ့ပေးတဲ့ ဓာတ်အားပေး စနစ်ဟာ မြေအောက်၊ လမ်းများ၏ အောက်ခြေ သို့မဟုတ် ကားပါကင် ဧရိယာများတွင် ထည့် သွင်း တည်ဆောက်နိုင်ပြီး ကြိုးမဲ့စွမ်းအင် ၁ မဂ္ဂါဝပ်လောက်အထိ ထောက်ပံ့ပေးနိုင်ပါတယ်။

မကြာသေးမီက သတင်းများအရ Tesla ၏ လာမည့် လျှပ်စစ်ထရပ်ကား Semi ဟာ ၎င်း၏ စွမ်းအင် လိုအပ်ချက်များကို ဖြည့်ဆည်းရန်အတွက် Wave မှ inductive ကြိုးမဲ့ အားသွင်းနည်းပညာကို အသုံးပြုဖွယ်ရှိနေပါတယ်။

Beyond Earth

Beyond Earth သည် အကျိုးအမြတ်မယူသော သုတေသန အင်စတီကျု့တစ်ခု ဖြစ်ပြီး အပြည့်အဝ လုပ်ဆောင်နိုင်သော နေရောင်ခြည်စွမ်းအင်သုံး ဂြိုလ်တုမှစွမ်းအင် ထုတ်လွှင့်မှု စနစ်တစ်ခုကို တည်ထောင်ရန် မျှော်မှန်းချက် အဆိုပြုထားပါတယ်။

အဆိုပြုထားသော ကြိုးမဲ့စနစ်ဟာ ကမ္ဘာမြေပေါ်ရှိ စက်မှုလုပ်ငန်းဆိုင်ရာ အသုံးချ ပရိုဂရမ်များအတွက် သာမက လပေါ်ရှိ လူသားများ၏ လုပ်ဆောင်ချက်များကိုပါ စွမ်းအားပေးနိုင်ကြောင်း အင်စတီကျုက အခိုင်အမာဆိုပါတယ်။

အဆိုပြုထားသည့် စွမ်းအင်စနစ်တွင် အဓိက ယူနစ်နှစ်ခုရှိပြီး ပထမယူနစ်မှာ အာကာသအတွင်းရှိ နေရောင်ခြည်စွမ်းအင်ကို ဂြိုဟ်တုမှ လက်ခံရရှိပြီး ၎င်း၏ photovoltaics၊ concentrators နှင့် WPT sub-units များဖြင့် လုပ်ဆောင်ကာ rectenna receiver မှ ကမ္ဘာသို့မဟုတ် လ သို့ လိုအပ်ချက် အပေါ်မူတည်ပြီး စွမ်းအင်ပေးပို့မှာ ဖြစ်ပါတယ်။

အဆိုပြုထားသည့် နေရောင်ခြည် ဂြိုလ်တုအခြေခံ ကြိုးမဲ့ စွမ်းအင် ထုတ်လွှတ်မှု စနစ် ကို ၂၀၃၀ လောက်မှာ ပြီးစီးမယ်လို့ အဆိုပါ အင်စတီကျူမှ ဆိုပါတယ်။

The Indiana Department of Transportation (INDOT)

အင်ဒီယားနား သယ်ယူပို့ဆောင်ရေး ဌာန (INDOT) ဟာ Purdue တက္ကသိုလ်နှင့် ဂျာမန် ဘိလပ်မြေ ထုတ်လုပ်သည့် ကုမ္ပဏီ Magment တို့နှင့် ပူးပေါင်းပြီး လျှပ်စစ်ဓာတ်အားသွင်းနိုင်သည့် သံလိုက်စွမ်းအင်သုံး ဘိလပ်မြေလမ်းများ စမ်းသပ်ရန် လုပ်ဆောင်နေပါတယ်။

ပထမအဆင့်မှာ Purdue တက္ကသိုလ် ဟာ အဆိုပြုထားတဲ့ သံလိုက်စွမ်းအင်အသုံးပုသည့် လမ်းများအတွက် ဓာတ်ခွဲခန်း သုတေသန စမ်းသပ်မှုများကို ပြုလုပ်မှာ ဖြစ်ပါတယ်။

တက္ကသိုလ်မှ အတည်ပြုပြီးပါက Magment မှ သံလိုက်စွမ်းအင် ဘိလပ်မြေကို အသုံးပြု၍ ၁၃၁၂ ပေ (၄၀၀ မီတာ) အရှည်ရှိသည့် စမ်းသပ်လမ်းကို တည်ဆောက်ပြီး ၂၀၀ ကီလိုဝပ် စွမ်းအင်သုံး ထရပ်ကားများဖြင့် လမ်းပေါ်တွင် စမ်းသပ်မှုများ ပြုလုပ်မှာ ဖြစ်ပါတယ်။

စမ်းသပ်မှုများ အောင်မြင်ပါက အများသုံး လမ်းများ ဖွံ့ဖြိုး တိုးတက် စေရန် နည်းပညာကို ဆက်လက် အသုံးပြုသွားမှာ ဖြစ်ပါတယ်။

ဒီ earth-based ကြိုးမဲ့ အားသွင်းစီမံကိန်းဟာ “လမ်းလျှပ်စစ် ဓာတ်အားပေး စနစ်အတွက် စွမ်းအင် အခြေခံ အဆောက်အအုံမှ တဆင့် ရေရှည် တည်တံ့မှုကို အဆင့်မြှင့်တင်ခြင်း” ASPIRE စီမံကိန်း၏ တစိတ်တပိုင်းဖြစ်ပြီး အမျိုးသား သိပ္ပံဖောင်ဒေးရှင်းနှင့် အခြားသော အစိုးရနှင့် ပုဂ္ဂလိက အင်စတီကျုများစွာမှ ကျောထောက်နောက်ခံ ပြုပေးထားပါတယ်။

ဒီအကြောင်းကို “လျှပ်စစ်ကားများကို မောင်းနှင်ရင်း အားသွင်းနိုင်မည့် လမ်းများကို စမ်းသပ်နေ” ခေါင်းစဉ်ဖြင့် ဩဂုတ်လအတွင်းက ဖော် ပြခဲ့ပြီး ဖြစ်ပါတယ်။

WiTricity

အမေရိကန် အခြေစိုက် ကုမ္ပဏီတခုဖြစ်တဲ့ WiTricity ဟာ မော်တော်ယာဉ်များ ရပ်ထားစဉ်အတွင်း လျှပ်စစ်စွမ်းအင်သုံး ကားများကို သံလိုက် resonator များမှတဆင့် အားသွင်းရန် ရည်ရွယ်သည့် park-and-charge နည်းပညာကို လုပ်ဆောင်နေပါတယ်။

နိဂုံး

အထက်ပါ ဖွံ့ဖြိုးတိုးတက်မှု လုပ်ငန်းစဉ်များကို ကြည့်ခြင်းအားဖြင့် Internet of things (IoT) ခေါ် အင်တာနက်နှင့် အခြားသော ကွန်ယက်များမှ တဆင့် အီလက်ရောနစ် ပစ္စည်းများကို အလုပ်လုပ်စေနိုင်၊ ခိုင်းစေနိုင်တဲ့ နည်းပညာနှင့် Artificial Intelligence (AI) ဥာဏ်ရည်တု နည်းပညာများနှင့်အတူ ကြိုးမဲ့ စွမ်းအင် ပို့လွှတ်မှုနည်းပညာဟာ လာမည့် နှစ်များအတွင်း လူသားအားလုံး မြင်တွေ့ရတော့မှာ ဖြစ်ပါတယ်။

ရေးသားသူ – Aurora (Knowledgeworms team)

Knowledgeworms Copyright © 2021 ကူးယူ ဖော်ပြခွင့် လုံးဝ ခွင့်မပြုပါ။

Content Protection by DMCA.com

Leave a Reply

Your email address will not be published.