ထူးခြားသည့် ဒီဇိုင်းနှင့် Douglas X-3 Stiletto ဂျက် လေယာဉ် စီမံကိန်း

History Military

ထူးခြားတဲ့ ဒီဇိုင်းနဲ့ ဂျက်လေယာဉ် တစင်းဖြစ်တဲ့ Douglas X-3 “Stiletto” ဟာ ရုတ်တရက်ကြည့်လိုက်ရင် အလွန်မြန်မယ့်ပုံဆိုတာ သံသယဖြစ်စရာ မရှိပါဘူး။

ဒီလေယာဉ်ဟာ တနာရီကို အမြင့်ဆုံး မိုင် ၂ ထောင်နှုန်းလောက် အမြန်နှုန်းဖြင့် အသံထက်မြန်သည့် အလျှင်ကို ထိန်းထားပြီး ဒုံးပျံကဲ့သို့ ပေါ့ပါး သွက်လက်စွာ ပျံသန်းနိုင်အောင် ဒီဇိုင်းဆွဲထားတာ ဖြစ်ပါတယ်။

ဒါပေမယ့် ဂျက်လေယာဉ်မှာ ပြဿနာလေး တခုပဲ ရှိပါတယ်။ အဲဒါကတော့ နှေးနေတာပါပဲ။

လေယာဉ်ကို အသံထက် ၂ ဆ လောက်မြန်အောင် ပျံသန်းနိုင်ဖို့ ဒီဇိုင်းထုတ်ထားခဲ့ပေမယ့် အသံအလျှင်ကိုတောင် ကျော်အောင် မပျံသန်းနိုင်ခဲ့ပါဘူး။

သို့ပေမဲ့ လေယာဉ်ကနေ ရရှိလာတဲ့ အကျိုးကျေးဇူးတွေတော့ အများကြီး ရှိနေခဲ့ပြီး တိုက်လေယာဉ်သစ် တစင်းကိုတောင် မွေးဖွားပေးနိုင်ခဲ့ပါတယ်။

တောင်ပံအချိုးကို စူးစမ်းလေ့လာခြင်း

X-3 ဂျက်လေယာဉ် စီမံကိန်းဟာ ရည်မှန်းချက်ကြီးမားတဲ့ စီမံကိန်း တခုဖြစ်ပြီး တာဘိုဂျက်အင်ဂျင်ဖြင့် အသံထက် ၂ ဆ အမြန်နှုန်းမှာ ကြာမြင့်စွာ ပျံသန်းဖို့အတွက် ရည်ရွယ်ထားတာပါ။

၎င်း၏ ယခင်မျိုးကွဲ X-1 နှင့် X-2 များကတော့ ကြီးမားတဲ့ ဗုံးကြဲလေယာဉ်ကြီးများ ဖြစ်တဲ့ B-29 နှင့် B-50 တို့က ချိတ်ဆွဲပြီး ကောင်းကင်မှာလွှတ်ချကာ ပျံသန်းရပေမယ့် X-3 ကတော့ ကိုယ့်အင်ဂျင်နှင့်ကိုယ် ပျံတက်နိုင်စွမ်း ရှိပါတယ်။

X-3 လေယာဉ်တွင် low-aspect-ratio wings ခေါ် ကျယ်ပြန့်ပြီး တိုတဲ့ တောင်ပံများကို တပ်ဆင်ကာ ၎င်းတို့ဟာ ဖြစ်နိုင်ချေရှိမရှိ ကိုပါ စမ်းသပ်ဖို့ ဒီဇိုင်းထုတ်ထားတာပါ။

ပုံမှန် ကျယ်ပြန့် ရှည်လျားတဲ့ တောင်ပံများဟာ ပင့်တင်အားနှင့် နောက်ဆွဲအား အချိုး ပိုကောင်းမွန်ပြီး ခရီးသည်တင် လေ ယာဉ် များနှင့် ဂလိုက်ဒါ များတွင် အသုံးပြုကြပေမယ့် X-3 ကြောင့် ကျယ့်ပြန့်တိုတောင်းတဲ့ တောင်ပံ၏ စွမ်းဆောင်ရည်ကို သိရှိလာစေခဲ့ပါတယ်။

low-aspect-ratio ရှိတဲ့ တောင်ပံများဟာ သမားရိုးကျ high-aspect-ratio တောင်ပံများထက် ကွေးညွှတ်နိုင်မှု ဖိအား သက်ရောက်ခံရမှု နည်းပါးပါတယ်။

နောက်ဆွဲအားကိုလည်း များစွာ လျော့ပါးစေပြီး လေယာဉ်ကို လေထဲတွင် လှိမ့်လို့ ပိုပြီး အဆင်ပြေစေပါတယ်။

ဒါ့ကြောင့် ယနေ့ခေတ် တိုက်လေယာဉ်များ အားလုံး နီးပါးလောက်ဟာ low-aspect-ratio တောင်ပံများကို အသုံးပြုနေကြတာ အံ့အားသင့်စရာတော့ မရှိပါဘူး။

ဒီစီမံကိန်းမှ X-3 ဟာ တိုက်တေနီယံ သတ္တုကို အကြီးအကျယ် ပထမဆုံး အသုံးပြုခဲ့သည့် ဂျက်တိုက်လေယာဉ်လည်း ဖြစ်ပါတယ်။

သတင်း အချက်အလက်များအရ စိတ်ပျက်စရာဖြစ်ခဲ့

၁၉၄၉ ခုနှစ်မှာ X-3 ဂျက်လေယာဉ် ၂ စင်းကို တည်ဆောက်ဖို့ ခွင့်ပြုချက်ရရှိခဲ့ပြီး Westinghouse J46 အင်ဂျင်များ တပ်ဆင်ဖို့ စီစဉ်ထားခဲ့ပါတယ်။

ဒါပေမယ့် အဆိုပါ အင်ဂျင်များဟာ X-3 အတွက် တွန်းအား၊ အလေးချိန် သို့မဟုတ် အရွယ်အစားလိုအပ်ချက်နှင့် မကိုက်ညီတဲ့အတွက် ပိုပြီး အားနည်းတဲ့ Westinghouse J34 အင်ဂျင်များကိုသာ တပ်ဆင်နိုင်ခဲ့ပါတယ်။

J46 အင်ဂျင်များဟာ တွန်းအား ပေါင် ၇ ထောင်လောက် ပေးစွမ်းနိုင်ချိန်မှာ J34 အင်ဂျင်ဟာ ပေါင် ၄,၉၀၀ လောက်သာ ပေးနိုင်တဲ့အတွက် အတော်လေး နည်းပါတယ်။

X-3 လေယာဉ်ကို ဒီဇိုင်းရေးဆွဲသူများမှ တတ်နိုင်သမျှ အပါးလွှာဆုံး နှင့် အသေးသွယ်ဆုံး ဖြစ်အောင် တည်ဆောက်ခဲ့တာကြောင့် အမြင်အားဖြင့် အတော်လေး ထူးခြားတဲ့ ဒီဇိုင်းလို့ ဆိုနိုင်ပါတယ်။

၎င်းတို့ဟာ အသံထက်မြန်တဲ့ အမြန်နှုန်းမှာ နောက်ဆွဲအား နည်းစေရန်နှင့် ရှည်လျှားလှတဲ့ လေယာဉ်နှုတ်သီးအတွင်းမှာ စမ်း သပ်ပစ္စည်းများ ထားရှိဖို့ အထူး ဒီဇိုင်းဆွဲခဲ့တာပါ။

လေယာဉ်ကိုယ်ထည်အတွင်းမှာ တစိတ်တပိုင်းမြှုပ်ထားတဲ့ လေယာဉ်မှူးခန်းနှင့် လေကာမှန် ဒီဇိုင်းများကတော့ အသံထက် ၂ ဆမြန်သည့်အချိန်တွင် အပူဒဏ်ခံရမှုကို လျှော့ချဖို့ ဖြစ်ပါတယ်။

ပျံသန်းတဲ့အခါမှာတော့ ရလဒ်များက စိတ်ပျက်စရာဖြစ်ခဲ့ပါတယ်။

၎င်းဟာ အန္တရာယ်ရှိတဲ့ တနာရီ မိုင် ၃၀၀ လောက် အမြန်နှုန်းနှင့်သာ ပျံတက်နိုင်ပြီး လိုအပ်သည့် တွန်းအားကို မရှိသည့် အင် ဂျင်ကြောင့် ထိန်းချုပ်ရခက်ခဲပါတယ်။

အမြင့်ဆုံး အမြန်နှုန်းဟာလည်း လျှင်မြန်စွာ ပြန်လည်ကျဆင်းတတ်ပြီး အသံထက် ၁.၁ ဆကို ရောက်ရှိဖို့ လေယာဉ်ဟာ ၁၅ ဒီဂရီလောက် စိုက်ဆင်းရပါတယ်။

Lockheed F-104 တိုက်လေယာဉ်အား မြင်ရစဉ်

X-3 အတွက် အမြင့်ဆုံး အမြန်နှုန်းဖြစ်သည့် အသံထက် ၁.၂၀၈ ဆ ကို ရောက်ရှိဖို့ လေယာဉ်ဟာ ၃၀ ဒီဂရီ စိုက်ဆင်းခဲ့ရတဲ့အတွက် ၎င်းဟာ သမားရိုးကျနည်းဖြင့် အသံထက်မြန်အောင် မပျံသန်းနိုင်ဘူးဆိုတာ မြင်သာစေပါတယ်။

အချုပ်ဆိုရရင် X-3 ဟာ မူလက စီစဉ်ထားသည့် အသံထက် ၂ ဆ မြန်သည့် အမြန်နှုန်းမှ အချက်အလက်များကို မပံ့ပိုးပေးနိုင်ပေမယ့် အကျိုးတော့ မမဲ့ခဲ့ပါဘူး။

အကြောင်းကတော့ X-3 ၏ ဒီဇိုင်းကြောင့် အမေရိကန်တို့ဟာ နာမည်ကျော် Lockheed F-104 Stafighter တိုက်လေယာဉ်ကို ဖန်တီးနိုင်ခဲ့ပါတယ်။

ဒါ့အပြင် အတက်အဆင်းအတွက် အမြန်နှုန်း အလွန်အမင်း လိုအပ်နေသည်မှာလည်း တောင်ပံကြောင့် ဖြစ်တာမဟုတ်ဘဲ လေယာဉ်ဘီး၏ တာယာနည်းပညာ တိုးတက်မှု လိုအပ်တာကြောင့် ဖြစ်တာကို တွေ့ရှိခဲ့ရပါတယ်။

ယနေ့မှာတော့ X-3 သုတေသန ဂျက်လေယာဉ်ကို အိုဟိုင်းယိုးပြည်နယ်ရှိ အမေရိကန်လေတပ်၏ အမျိုးသားပြတိုက် တွင် ပြသထားပါတယ်။

ရေးသားသူ – Aurora (Knowledgeworms team)

Knowledgeworms Copyright © 2021 ကူးယူ ဖော်ပြခြင်း လုံးဝ ခွင့်မပြုပါ။

Content Protection by DMCA.com

Leave a Reply

Your email address will not be published. Required fields are marked *