ကီလိုမီတာအရှည်အထိ ဆန့်နိုင်မယ့် ဖိုက်ဘာဘတ္တရီ အမျိုးအစားသစ် အကြောင်း

Innovation Tech

ကွေးညွှတ်နိုင်ပြီး ပြန့်ကားနိုင် ကျုံ့နိုင်တဲ့ စွမ်းအင် သိုလှောင်တဲ့ ကိရိယာများဟာ လူတွင် ဝတ်ဆင်ရတဲ့ အနာဂါတ် အီလက်ထရွန်းနစ် ပစ္စည်များတွင် တပ်ဆင်အသုံးပြုဖို့အတွက် ကြီးမားတဲ့ အခန်းကဏ္ဍမှ ပါဝင်နေသောကြောင့် သုတေသီများဟာ အပြိုင်အဆိုင် ထုတ်လုပ်ဖို့ ကြိုး စားနေကြပါတယ်။

“စက္ကူထက် ၁၅ ဆလောက် ပိုမို ပါးလွှာမယ့် လက်ရှိ ဆိုလာပြားများကို အစားထိုးမယ့် ပစ္စည်းသစ်” နှင့် “စင်္ကာပူရှိ သုတေသီများမှ စက္ကူလောက် ပါးလွှာတဲ့ Zinc ဘတ္ထရီသစ်ကို တီထွင်လိုက်တဲ့ အကြောင်း” စသည့် ခေါင်းစဉ်များဖြင့် ဖော်ပြခဲ့သည့် ဆောင်းပါးများဟာ ဒီလို လိုအပ်မှုကို သက်သေပြနေပါတယ်။

မကြာသေးမီကပဲ Massachusetts Institute of Technology (MIT) မှ အင်ဂျင်နီယာများဟာ တမူ ထူးခြားတဲ့ ဂုဏ်သတ္တိများ ရှိသည့် ပစ္စည်းတမျိုးကို ထုတ်လုပ်လိုက်ပါတယ်။

ကြိုးမှ စွမ်းအင်ပေးနေပုံ Image: Courtesy of MIT via Newatlas

အဲဒါကတော့ အားပြန်လည်သွင်းနိုင်တဲ့ မိုက်ခရွန် ရာဂဏန်းလောက် (၁ မိုက်ခရွန်ဟာ တမီတာ၏ အပုံတသန်းပုံ တပုံ ရှိပါတယ်) အထူသာ ရှိပြီး မီတာ ၁၄၀ (၄၆၀ ပေ) လောက်ရှည်လျှားပါတယ်။

ဒီ ဘတ္တရီဟာ သာမန် အဝတ်အစားများနှင့် ပေါင်းစပ် အသုံးပြုနိုင်သည့်အပြင် လက်ရှိ ထုတ်လုပ်ထားသည့် အရှည်ထက် အဆပေါင်းများစွာ ပိုမိုရှည်အောင် ထုတ်လုပ်နိုင်သေးပါတယ်။

ယက်လုပ်နိုင်သည့် ချည်မျှင်များအဖြစ် ပုံဖော်ထားသည့် ဘတ္တရီများဟာ ချည်မျှင်များနှင့် ပေါင်းစပ်ပြီး မည်သည့် အဝတ်အထည်များတွင်မဆို ပေါင်းစပ် အသုံးပြုနိုင်ကာ စွမ်းအင်အရင်းအမြစ်အဖြစ် လုပ်ဆောင်နိုင်ကြောင်းကို ၂၀၁၄ ခုနှစ်က နမူနာတခုအနေဖြင့် ပြသခဲ့ပြီး ဖြစ်ပါတယ်။

၂၀၁၄ ခုနှစ်မှ ချည်မျှင် ပုံစံ ဘတ္တရီပုံစံ Image Courtesy of Wei Weng via Newatlas

ဒါ့အပြင် ကျွန်တော်တို့ဟာ အထည်များနှင့် ဆင်တူပြီး သုံးစွဲသူ၏ ချွေးထဲမှ ဘက်တီးရီးယားဆဲလ်များကို အသုံးပြုကာ စွမ်းအင်ပေးနိုင်သည့် ကျုံ့နိုင် ဆန့်နိုင်တဲ့ ဘတ္တရီဒီဇိုင်းများကိုလည်း တွေ့မြင်ခဲ့ပြီး ဖြစ်ပါတယ်။

MIT မှ သိပ္ပံပညာရှင်များဟာ ထိုကဲ့သို့ စွမ်းအင်ထုတ်နိုင်သည့် fiber ကြိုးမျှင်များကို ထုတ်လုပ်နိုင်ဖို့ fiber ကြိုးထဲသို့ ထည့်သွင်းမည့် လို အပ် သည့် ပစ္စည်းများကို ဆလင်ဒါကြီး တခုတွင် ထည့်ကာ အရည်ပျော်မှတ် အောက်လောက်မှာ အပူပေးပါတယ်။

အဲဒီ့နောက်မှာတော့ ထိုပစ္စည်းများကို fiber ကြိုး၏ ကျဉ်းမြောင်းသည့် အပေါက်မှတဆင့် မူလ အချင်း အတိုင်းအတာ အတိုင်း တွန်းထည့်ကာ လိုချင်သည့် ပုံစံအတိုင်း စီစဉ်ထားပါတယ်။

ယခင်က ကြိုးစားခဲ့သည့် ဒီဇိုင်းများနှင့် မတူတဲ့အချက်က အဓိကပစ္စည်းဖြစ်သည့် lithium ကို Fiber ကြိုးအတွင်းပိုင်းမှာ ထည့်သွင်း တည် ဆောက်ထားပြီး အပြင်ဘက်တွင် အကာအကွယ်တခု ထားရှိပေးထားပါတယ်။

ဒါ့အပြင် အတွင်းတွင် ဆန်းသစ် ထူးခြားသော နည်းပညာဖြင့် ထုတ်လုပ် ထားသည့် gel electrodes နှင့် gel electrolyte များကို ထည့် သွင်းထားသည့်အတွက် ဘတ္တရီကို မီးလောင်ခြင်းမှ တားဆီးနိုင်ပါတယ်။

ဘက်တီးရီးယားများမှ စွမ်းအင်ယူမယ့် ဘတ္တရီပုံစံ ဒီဇိုင်း Image: Courtesy of Seokheun Choi via Newatlas

ရလဒ်အနေဖြင့် ထွက်ရှိလာတဲ့ ဘတ္တရီအသစ်ဟာ ယခင် ဒီဇိုင်းများထက် ပိုမို ပါးလွှာပြီး လိုက်လျောညီထွေ လှုပ်ရှားနိုင်မယ်လို့ အခိုင်အမာဆိုထားပါတယ်။

လက်ရှိ အလျား ၁၄၀ မီတာရှိပြီး သိုလှောင်မှုပမာဏ 123 mAh လောက်အထိရှိတဲ့ ဒီ ဘတ္ထရီဟာ ကမ္ဘာပေါ်တွင် အရှည်လျားဆုံးသော ဖိုက်ဘာကြိုးဘတ္တရီ အမျိုးအစား ဖြစ်လာပါတယ်။

အဖွဲ့ဟာ ဒီ ဖိုက်ဘာကြိုး ဘတ္တရီကို လျှပ်စစ်စွမ်းအင်သုံး အရုပ် ရေငုပ်သင်္ဘာငယ်တွင်ရစ်ပတ်ကာ Li-Fi ဆက်သွယ်ရေးစနစ် (WIFI မဟုတ်ပါ။ အချက်အလက်များကို light pulse ဖြင့် ပေးပို့သည့် နည်းပညာဖြစ်ပါတယ်) ကို အသုံးပြုပြီး စမ်းသပ် သရုပ်ပြခဲ့ပါတယ်။

“မီတာ ၁၄၀ လောက် အရှည်ရှိတဲ့ ဒီ ဘတ္တရီဟာ အထင်ကြီးလောက်စရာ ဖြစ်သည့်အပြင် Khudiyev အဆိုအရ “ဒီထက် ရှည်လျားတဲ့ အ လျား အတွက် အကန့်အသတ်မရှိဘဲ ကီလိုမီတာလောက် ရှည်တဲ့ အရှည်အထိ သေချာပေါက် လုပ်ဆောင်နိုင်မယ်” လို့ သိရပါတယ်။

ဖိုက်ဘာကြိုး ဘတ္တရီဟာ စက်နှင့်လည်း လျှော်ဖွပ်နိုင်ပြီး ၎င်း၏ အရှည် ရှိလျှင် ရှိသလောက် တလျှောက်လုံးမှာ ကိရိယာပေါင်းများစွာနှင့် ချိတ်ဆက်နိုင်မယ်လို့လည်း ဆိုပါတယ်။

ရေငုပ်သင်္ဘောငယ်တွင် ဖိုက်ဘာကြိုး ဘတ္တရီကို ရစ်ပတ်ထားပုံ Image: Courtesy of MIT

“ကျွန်တော်တို့ရဲ့ ဒီလိုနည်းပညာကို ချဉ်းကပ်နိုင်မှုရဲ့ အလှတရားတခုကတော့ Fiber ကြိုးတခုကို အသုံးပြုပြီး စက်ပစ္စည်းများစွာကို ချိတ်ဆက် ပေးနိုင်မှာပဲ ဖြစ်တယ်” လို့ လေ့လာမှုစာတမ်းကို ရေးသားသူ Jung Tae Lee က ပြောကြားခဲ့ပါတယ်။

သိပ္ပံပညာရှင်များဟာ လက်ရှိတွင် အဆိုပါ ဘတ္တရီ၏ စွမ်းဆောင်ရည်နှင့် ထုတ်လုပ်နိုင်မည့် စွမ်းအင်ကို အခြား ပါဝင် ပစ္စည်းများကို အသုံးပြုပြီး မည်ကဲ့သို့ မြှင့်တင်ပေးနိုင်မယ်ဆိုတာကို ဆက်လက် လေ့လာနေကြပါတယ်။

၎င်းတို့ဟာ ဒီနည်းပညာအတွက် မူပိုင်ခွင့် တခုကိုလည်း လျှောက်ထားပြီးဖြစ်ကာ နှစ်အနည်းငယ်အတွင်းမှာ စီးပွားဖြစ် ထုတ်ကုန်များအဖြစ်သို့ ရောက်လာနိုင်ဖွယ် ရှိနေပါတယ်။

ရေးသားသူ – Aurora (Knowledgeworms team)

Knowledgeworms Copyright © 2021 ကူးယူ ဖော်ပြခွင့် လုံးဝ ခွင့်မပြုပါ။

Content Protection by DMCA.com

Leave a Reply

Your email address will not be published.