တစောင်းခါးဟာ အညာသူ အညာသားတွေအရမ်းကြိုက်နှစ်သက်တဲ့ ဟင်းလျာတစ်ခွက်ပဲဖြစ်ပါတယ်။ တခါစားဖူးရင် ထပ်ခါထပ်ခါစားချင်တာ တစောင်းခါးဟင်းရဲ့ အနှစ်သာရပါ။ အသားဟင်း တစ်ခွက်မှမလိုဘဲ ထမင်းမြိန်ချင်ရင်တော့ တစောင်းခါးဟင်းလေး တစ်ခွက်လောက်တော့ စမ်းပြီး ချက်စားကြည့်သင့်ပါတယ်နော်။
ပါဝင်ပစ္စည်းများ
၁-တစောင်းခါး (၁၅)ကျပ်သား
၂-ခရမ်းချဉ်သီး (၁)လုံး
၃-ကြက်သွန်နီ (၂)လုံး
၄-ကြက်သွန်ဖြူ (၁)ဥ
၅-ငြုပ်ကြမ်းမှုန့် အနည်းငယ်
၆-မျှင်ငပိ လဘက်စားဇွန်း (၁)ဝက်
၇-ဆား ဆနွင်း ဟင်းခတ်မှုန့် အနည်းငယ်
၈-ဆီ ထမင်းစားဇွန်း (၄)ဇွန်း
၉-ပုဇွန်ခြောက် အနည်းငယ် (မထည့်လဲရပါတယ်။)
ကြော်ချက်နည်း
ပထမဆုံးတစောင်းခါးတွေကို ရေစင်စင်ဆေးပြီး ငြုပ်ကျည်ပွေ့ဖြင့် ထုပါ.ထုထားသောတစောင်းခါးများဆားဖြင့်ဖိနယ်ပေးပါ။ (အခါးရည်ထွက်သွားစေရန် )
ထို့နောက် ဆားနယ်ထားသော တစောင်းခါးများကို ရေစင်အောင်ဆေးပေးပါ။
၁-ဒယ်အိုးပူလာလျှင် ဆီထည့်ပြီး ကြက်သွန်ဖြူနီ ကို ဆနွင်းအနည်းငယ်ထည့် ဆီသပ်ပါ။
၂-ကြက်သွန်ဖြူနီ ဆီသပ်တာမွှေးလာလျှင် ခရမ်းချဉ်သီးထည့်ပါ။
၃-မျှင်ငပိ ဆား ဟင်းခတ်မှုန့် ငြုပ်ကြမ်းမှုန့် ထည့်ပါ။
၄-ခရမ်းချဉ်သီးနွမ်းလာလျှင် ထုထားသော တစောင်းခါးများထည့်ပါ။
၅-ပုဇွန်ခြောက်ထည့်ပြီး ရေအနည်းငယ်ထည့် အဖုံးအုပ်ထားပါ။
၆-ဆီပြန်လာလျှင် ထမင်းမြိန်တဲ့ တစောင်းခါးကြော်လေး ရပါပြီရှင်။
တစောင်းခါးစားပြီးရေသောက်ရင် ဘယ်လိုအရသာလေးရလဲသိချင်ရင် ကြော်စားကြည့်ပါနော်
